Oda e Inxhinierëve të Republikës së Kosovës (OIRK) njofton se ka publikuar Projekt Rezolutën me titull “Kategorizimi i ndërtimit, çmimi mesatar referues i ndërtimit dhe çmimet minimale referuese për shërbime arkitektonike dhe inxhinierike”, e cila është pjesë e Rendit të Ditës së Mbledhjes së Kuvendit të OIRK-së.
Kjo Projekt Rezolutë synon vendosjen e një kornize profesionale dhe orientuese për:
- kategorizimin e objekteve ndërtimore,
- përcaktimin e çmimit mesatar referues të ndërtimit,
- si dhe përcaktimin e çmimeve minimale referuese për shërbimet arkitektonike dhe inxhinierike në fushën e ndërtimit.
Dokumenti ka për qëllim mbrojtjen e vlerës së punës profesionale të arkitektëve dhe inxhinierëve, rritjen e cilësisë së shërbimeve, forcimin e etikës profesionale dhe rritjen e sigurisë publike, duke ofruar një bazë reale dhe të qëndrueshme referuese për sektorin publik dhe privat.
Çmimet e përcaktuara në këtë Projekt Rezolutë kanë karakter referues dhe orientues, dhe nuk synojnë të kufizojnë konkurrencën e lirë në treg.
Projekt Rezoluta do të shqyrtohet në Mbledhjen e Kuvendit të OIRK-së, e cila do të mbahet më 7 shkurt 2026.
