Informata dhe Aktivitete

Falënderojmë sinqerisht 348 anëtarët që, nga gjithsej 853 anëtarë themelues (pjesë e Kuvendit), ndanë kohën e tyre dhe u paraqitën për pjesëmarrje, duke treguar përkushtim dhe përgjegjësi ndaj Odës dhe profesionit. Pjesëmarrja e tyre është dëshmi e vullnetit për ta fuqizuar OIRK-në dhe për të ndërtuar një institucion të qëndrueshëm e funksional.

Njëkohësisht, është e rëndësishme të thuhet qartë: vendimmarrja për forcimin e Odës bëhet në Kuvend. Kur Kuvendi nuk mban mbledhje për shkak të mungesës së pjesëmarrjes, atëherë vështirësohet drejtpërdrejt funksionimi dhe avancimi i institucionit që na përfaqëson të gjithëve. Statuti e njeh pjesëmarrjen si të drejtë, por ekziston një bazë e fortë morale, profesionale dhe institucionale për t’u kërkuar anëtarëve përgjegjësi dhe angazhim: Oda nuk mund të ecë përpara pa pjesëmarrjen aktive të anëtarësisë së saj.

Duhet theksuar gjithashtu se organizimi i mbledhjeve kërkon mund, kohë dhe resurse, si dhe përfshin shpenzime konkrete (logjistikë, sallë, pajisje, dokumentacion dhe organizim). Këto përgatitje bëhen me seriozitet dhe me qëllim të vetëm: që Oda të funksionojë dhe të marrë vendime në interes të përbashkët të anëtarëve.

Kuvendi i rregullt mbahet minimum një herë në vit. Ne besojmë se sakrifica e një dite në vit është e mundshme për secilin prej nesh, nëse synimi ynë është ta bëjmë OIRK-në më të fortë e më të zëshme në mbrojtje të profesionit, më funksionale në shërbim të anëtarëve, dhe të punojmë bashkë për ngritjen e standardit të inxhinierit, përfshirë edhe mbrojtjen e dinjitetit profesional dhe vlerësimin e drejtë të punës sonë.

Ftojmë të gjithë anëtarët që, në thirrjet e radhës, të tregojnë angazhim dhe përgjegjësi profesionale, në mënyrë që vendimet e rëndësishme për profesionin tonë të merren aty ku e kanë vendin: në Kuvend.

Me respekt,

Oda e Inxhinierëve të Republikës së Kosovës – OIRK

Arsim Rapuca, Kryetar